Зохицуулах зөвлөлийн 2021 оны ээлжит хуралдааныг 11 дугаар сарын 24-ний өдөр цахим хэлбэрээр зохион байгуулж, хуульд заасан бүрэн эрхийнхээ хүрээнд тусгай зөвшөөрлийг шинээр олгох, сунгах болон бусад асуудлуудыг хэлэлцэв. Үүнд:
Хот, суурины ус хангамж, ариутгах татуургын ашиглалтын тухай хуулийн 10 дугаар зүйлийн 10.1.1, 10.1.3 болон 12 дугаар зүйлд заасны дагуу:
- Улаанбаатар хотын “Ус сувгийн удирдах газар” ОНӨААТҮГ, Багануур дүүргийн “Багануур-Ус” ААТҮГ, Улаанбаатар хотын ОСНААҮ-ний “Санкомфор” ХХК, “Гангар-Орд” ХХК, бохир усыг тусгай зориулалтын автомашинаар зөөвөрлөх үйлчилгээний “Өгөөмөр дэлгэр ширээт” ХХК зэрэг аж ахуйн нэгж, байгууллагуудын Нийтийн аж ахуйн ажил, үйлчилгээ эрхлэх тусгай зөвшөөрлийг 3 болон 5 жилийн хугацаатай тус тус сунгалаа.
- Бохир усыг тусгай зориулалтын автомашинаар зөөвөрлөх үйлчилгээний “Шинэ өргөө дэвжих трейд" ХХК-д Нийтийн аж ахуйн ажил, үйлчилгээ эрхлэх тусгай зөвшөөрлийг 3 жилийн хугацаатай олголоо.
- Өмнөговь аймгийн НААҮ-ний “Гүний-Ус” ХХК-ийн болон зарим сумдын усны үйлчилгээний тарифт зохицуулалт хийж, борлуулалтын орлогын шаардагдах хэмжээг шинэчлэн баталлаа.
- Баянхонгор аймгийн “Чандмань Баянхонгор” ХК-ийн цэвэр, бохир усны үйлчилгээний тариф баталсан 2021 оны 48 дугаар тогтоолд нэмэлт, өөрчлөлт орууллаа.
- Зохицуулах зөвлөлийн 2018 оны 11 дүгээр тогтоолын хавсралтаар батлагдсан “Цэвэр, бохир усны үйлчилгээний тариф, төлбөр тооцох аргачлал”-д нэмэлт өөрчлөлт орууллаа.
